ⴰⵙⴼⵍⵙ ⵏ ⵡⴰⴷⴰⴼ ⵏ ⵉⵡⴷⴰⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ ⵙ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⵍⵎⵖⵔⵉⴱ, ⴷ ⵜⴰⵎⵙⵙⵉⵍⵉⵜ ⵜⴰⵙⵜⵕⴰⵜⵉⵊⵉⵢⵜ ⵉ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ 2015- 2030
ⵢⵓⵔⴰ ⵜ: ⵄⴱⴷⵍⵡⴰⵃⵉⴷ ⴱⵓⵜⴱⴰⵖⴰ
ⵉⴳⴰ ⵓⵙⴼⵍⵙ ⵏ ⵡⴰⴷⴰⴼ ⵏ ⵉⵡⴷⴰⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ ⵙ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⵍⵎⵖⵔⵉⴱ, ⴷ ⵜⴰⵎⵙⵙⵉⵍⵉⵜ ⵜⴰⵙⵜⵕⴰⵜⵉⵊⵉⵢⵜ ⵉ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ 2015- 2030 ⴷ ⵓⵏⴰⵥⴰⵕ ⵉ ⵓⵙⵡⵓⵔⵉ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵢⴰⵏ ⵓⵡⵜⵜⴰⵙ ⵙⴳ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵏⴼⴳⴰⵏⵜ ⵉⴼⵜⴰⵏ ⵙ ⵜⵏⴽⵔⴰ ⵏ ⵜⵎⴷⵔⴰⵡⵜ ⵉⵙⵎⴷⵏ ⴷ ⵉⵕⵡⴰⵏ ⵉ ⵉⵡⴷⴰⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ.
ⴰⵔ ⵜⵙⵎⴷⵢⴰ ⵜⵣⵉⴳⵣⵜ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵙⵖⵔⵜ ⵏ ⵉⵡⴷⴰⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ ⵎⴽⵏⵏⴰ ⵜⴳⴰ ⵜⵙⴽⴼⵍⵜ ⵏ ⵓⵎⵎⵓⵄⴹⵕ ⵏⵏⵙⵏ, ⵎⴽⵏⵏⴰ ⵉⵎⵣⴰⵔⴰⵢ ⵓⵡⵜⴰⵢ ⵏⵏⵙⵏ, ⴷ ⵓⵥⵓⵕ ⵏⵏⵙⵏ ⴰⵏⴰⵎⵓⵏ ⴷ ⵓⴷⵎⵙⴰⵏ ⴷ ⵓⴷⵍⵙⴰⵏ, ⴰⵏⴰⵥⴰⵕ ⴰⴳⵔⵉⵎⵏⴰⴷⵏ.
ⵏⵜⵜⴰ ⴷ ⴰⵏⴰⵥⴰⵕ ⴰⵏⵉⵎⴰⵏ, ⵉ ⵓⴼⴳⴰⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ, ⵉⵙⵖⴰⵡⵙⴰ ⵙ ⵓⵙⵎⵓⵙⵙⵓ ⵏ ⵜⵣⵎⵎⴰⵔ ⵏⵏⴰ ⴷⴰⵔⵙ ⵉⵍⵍⴰⵏ, ⴷ ⵓⵏⵎⴰⵍⴰ ⵏ ⵉⴱⴱⴰⵢⴹⴰⵕⵏ ⵉⵡⵏⴹⴰⵏⵏ ⵍⵍⵉ ⵉⵜⵜⵏⵎⴰⵍⴰ.
ⴷ ⴰⵏⴰⵥⴰⵕ ⴰⵎⵙⵖⴰⵔⵓ ⵉ ⵡⴰⵎⵓⵏ, ⵉⵍⵍⴰ ⵅⴼ ⵉⴳⵎⴰⵎⵏ ⵏⵏⵙ ⴰⴷ ⵙⵏⴼⵍⵏ ⵜⵉⵡⵍⴰⴼⵉⵏ ⵜⵓⵣⴷⵉⵔⵉⵏ ⴷ ⵜⵡⵏⴳⵉⵎⵉⵏ ⵜⵉⵙⵔⵜⵓⵜⵉⵏ ⴷⴰ ⵓⵙⵉⵏ ⵅⴼ ⵓⵎⵎⵓⵄⴹⵕ, ⴷ ⵓⵙⵙⵉⵏⴼ ⵏ ⵉⴱⴱⴰⵢⴹⴰⵕⵏ ⴷⴰ ⵢⵓⵎⵎⵏ ⴰⵙⴱⵖⵔ ⵏ ⵉⵡⴷⴰⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ ⴳ ⵓⵣⵔⴼ ⵏⵏⵙⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴷ ⵓⵙⴰⴷⴼ ⵏⵏⵙⵏ ⵏ ⵡⴰⵎⵓⵏ ⵏ ⵜⵓⵙⵙⵏⴰ, ⴷ ⵓⵙⵙⵔⵅⵓ ⵏ ⵜⴷⵔⴰⵡⵜ ⵏⵏⵙⵏ ⵉⵙⵎⴷⵏ ⴷ ⵉⵕⵡⴰⵏ.
ⴷ ⴳ ⵓⵎⴳⴳⴰⵔⵓ, ⴷ ⴰⵏⴰⵥⴰⵕ ⵉⵙⵖⴰⵡⵙⴰⵏ ⵙ ⵓⵙⵎⴰⵔ ⴷ ⵓⵣⵣⴳⵉⵔ ⵏ ⵜⵙⵔⵜⵉⵜⵉⵏ ⵜⵉⵙⴳⵎⴰⵏⵉⵏ ⴷ ⵜⵏⴰⵎⵓⵏⵉⵏ ⵖⵓⵔ ⴰⵡⵜⵜⴰⵙ ⵏ ⵓⵙⵡⵓⵔⵉ ⵏ ⵉⵣⵔⴼⴰⵏ ⴰⴽⴽⵯ ⵉⵜⵜⵓⵙⴹⵕⵉⵚⵏ ⴼⵍⵍⴰⵙ ⴳ ⵜⵎⵢⴰⵇⵇⴰⵏⵉⵏ ⴷ ⵜⵏⵜⵜⴰⵎⵉⵏ ⵜⵉⴳⵔⴰⵖⵍⴰⵏⵉⵏ, ⵅⴼ ⵜⵙⵖⵥⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵙⵍⴰⵡⴰⵏ ⴰⴽⴽⵯ ⵜⴰⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵉⵡⴷⴰⵏ ⵏⵏⴰ ⴷ ⴷⴰⵔ ⴰⵎⵎⵓⵄⴹⵕ ⴷ ⵍⴱⵕⵓⵜⵓⴽⵓⵍ ⵏⵏⵙ ⴰⵔⵓⵛⵛⵉⵍ ⴳ ⵉⴱⵔⵉⵔ 2009, ⴷ ⵉⴱⴹⵉⵜⵏ ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⴳ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵜⴳⵔⵓⵎⵎⴰ ⴰⴷ ⵜⴰⵏⴰⵎⵓⵏⵜⴷ ⵓⴼⵔⴰⴳ ⵏⵏⵙ, ⴳ ⵉⵎⵉⵔⵏ (ⵉⵎⴰⴳⵔⴰⴷⵏ) 31 ⴷ 34, ⵖ ⵉⵍⵍⴰ ⵓⵣⵔⴼ ⵅⴼ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵙⵖⵔⵜ ⴷ ⵓⵙⴰⴷⴼ ⴰⵏⴰⵎⵓⵏ.
ⵜⴰⵙⵖⵏⵜ ⵏ ⵜⵉⵏⵎⵍ ⴰⵙⵙ ⴰⴷ, ⴷ ⵓⵙⵓⵊⵊⴷ ⵏ ⵓⴼⵙⵔ ⴰⵙⴳⵎⴰⵏ ⴰⵏⵙⴷⴰⴼ, ⴰⴷ ⵉⵙⵣⵎⵔ ⵉⵎⵥⵢⴰⵏⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ ⴳ ⵓⵣⵔⴼ ⵏⵏⵙⵏ ⵏ ⵓⵙⵍⵎⴷ ⵣⵓⵏ ⴷ ⵏⵏⵙⵏ ⵣⵓⵏ ⴷ ⵉⵎⵥⵢⴰⵏⵏ ⴰⴽⴽⵯ, ⴰⵎ ⵉⵍⵍⴰ ⵓⵢⴰ ⵏⵏ ⴳ ⵓⵙⵡⵉⵔ ⵏ ⵜⵓⵚⴽⵉⵡⵜ ⵏ ⵓⵙⵏⴱⴳ, ⵏⵉⵖ ⴳ ⵓⵙⵡⵉⵔ ⵏ ⵉⵖⴰⵡⴰⵙⵏ ⴷ ⵉⴱⵔⴷⴰⵏ ⴷ ⵉⵎⴰⵙⵙⵏ.
ⴳ ⵓⵙⵉⵍⴰⵏ ⴰⴷ, ⴰⵙⴳⵎⵉ ⴰⵎⵙⵉⴷⴼ ⵉ ⵉⵡⴷⴰⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⴹⵕ, ⴷ ⴰⵣⵣⵔⵓⵢ ⵉⵙⵖⴰⵡⵙⴰⵏ ⵙ ⵜⵓⴳⴳⴰⵙ ⵎⵓⵏⵏⵉⵏ ⵏ ⵉⵎⵙⴽⴰⵔⵏ ⵉⵎⵢⴰⵏⴰⵡⵏ ⵉⵣⴷⵉⵏ ⴷ ⵓⵙⵏⵜⵍ ⴰⴷ.